Gwerthuso a gwella (AC:GG)

Mae pob dysgwr yn haeddu’r cyfle i ffynnu.

Mae ysgolion effeithiol yn ceisio’n barhaus i ddeall:

• pa mor dda y mae dysgwyr yn gwneud cynnydd

• beth sy’n gweithio’n dda a beth y gellid ei wella

Maent yn defnyddio tystiolaeth, mewnwelediad proffesiynol a chydweithio i nodi blaenoriaethau a gweithredu mewn ffyrdd sy’n gwneud gwahaniaeth cadarnhaol i ddysgwyr. Mae’r AC:GG wedi’i ddatblygu i gefnogi ysgolion yn y gwaith hwn.

Nid yw gwerthuso a gwella yn brosesau ar wahân. Mae gwerthuso yn helpu ysgolion i ddatblygu dealltwriaeth gyffredin o gryfderau, heriau a chyfleoedd. Gwella yw’r camau gweithredu a gymerir mewn ymateb. Gyda’i gilydd, maent yn cefnogi gwelliant parhaus a deilliannau gwell i ddysgwyr.

Mae gwella yn cael ei gryfhau drwy gydweithio. Mae cynnwys dysgwyr, staff, teuluoedd, llywodraethwyr, partneriaid ac ysgolion eraill yn helpu i:

• ddyfnhau dealltwriaeth

• herio rhagdybiaethau

• meithrin gallu ar y cyd i wella

Nid yw ysgolion yn gwella ar eu pen eu hunain. Maent yn gwella drwy ddeialog broffesiynol, ymholi ar y cyd a dysgu gan eraill.

Mae’r AC:GG yn cynnig canllawiau ymarferol, offer a chwestiynau ysgogi.

Maent i gefnogi ysgolion ar wahanol gamau o’u gwaith gwerthuso a gwella. Bwriedir i’r adnodd fod yn hyblyg ac yn ymatebol i gyd-destun. Nid oes angen gweithio drwy bob adran na defnyddio pob adnodd. Dewiswch y gefnogaeth sydd fwyaf perthnasol i’ch blaenoriaethau a’ch anghenion.