Asesiadau personol: canllawiau i ysgolion

Ar ôl i ddysgwyr gwblhau eu hasesiadau, bydd gan ysgolion fynediad at amrywiaeth o adroddiadau ac adborth ar eu:

• sgiliau

• cynnydd

• sgoriau safonedig ar sail oedran

Gall ysgolion ddefnyddio’r wybodaeth hon i helpu i gynllunio dysgu ac addysgu.

Gosodir y gofynion ar gyfer y flwyddyn academaidd hon yn llawlyfr gweinyddu’r asesiadau personol.

Bydd angen mewngofnodi i Hwb i gael mynediad at yr asesiadau. Ar ôl mewngofnodi, dewiswch yr eicon asesiadau personol ar eich dangosfwrdd.

Mae'r fideo hwn yn dangos sut i fewngofnodi i Hwb a chael mynediad at y wefan asesiadau personol.

Yn ystod y flwyddyn academaidd hon, mae asesiadau personol darllen a rhifedd yn fandadol i'w defnyddio ym Mlynyddoedd 2 i 9. Mae llawlyfr gweinyddu’r asesiadau personol yn amlinellu’r gofynion ar gyfer eleni.

Mae’n nodi bod:

• ysgolion yn gallu amserlennu asesiadau personol ar adeg y maent yn ei hystyried yn fwyaf buddiol i gefnogi addysgu, dysgu a chynnydd

• yn rhaid i ddysgwyr wneud pob asesiad unwaith yn ystod y flwyddyn academaidd (gall ysgolion hefyd gynnal yr asesiadau unwaith yn rhagor yn ystod y flwyddyn academaidd)

Gofynnir i athrawon sicrhau bod eu holl ddysgwyr yn defnyddio'r asesiadau ymgyfarwyddo ar Hwb. Bydd hyn yn rhoi cyfle i ddysgwyr roi cynnig ar y mathau o gwestiynau cyn cymryd yr asesiadau.

Mae’r canllaw i ddefnyddwyr ar y wefan asesu yn darparu gwybodaeth ymarferol fanwl am:

• amserlennu a chyflwyno'r asesiadau (gan gynnwys rhestrau gwirio)

• cael gafael ar adroddiadau

Mae'r asesiadau personol yn addasol. Mae hyn yn golygu y caiff y cwestiynau eu dewis ar sail ymateb dysgwr i'r cwestiynau blaenorol. Mae hyn yn cynnig profiad asesu sydd wedi'i deilwra ar gyfer pob dysgwr. Bydd yn helpu pob dysgwr i ddatblygu eu sgiliau drwy ddeall:

• yr hyn y gallant ei wneud

• yr hyn efallai y mae angen iddynt ei wella

• eu camau nesaf posibl

Mae'r asesiadau yn rhoi gwybodaeth i ysgolion am sgiliau dysgwyr unigol, grwpiau a dosbarthiadau cyfan.

Nid oes unrhyw 'gyfnod asesu' ar gyfer asesiadau personol. Mae amseru yn ôl disgresiwn yr ysgol.

Gall y dysgwyr sefyll yr asesiadau personol naill ai mewn grwpiau bach neu grwpiau mawr, yn dibynnu ar ddewisiadau a chyfleusterau'r ysgol. Nid oes angen nifer fawr o ddyfeisiau ar ysgolion.

Mae sgoriau safonedig ar sail oedran a sgoriau cynnydd yr asesiadau hynny sy’n cael eu gwneud o fis Medi 2023 ymlaen yn ystyried yr ‘amser dysgu’ a gafwyd yn yr ystafell ddosbarth. Mae hyn yn cefnogi a gwella dealltwriaeth o gynnydd y dysgwyr o dan y Cwricwlwm i Gymru.

O fis Medi 2023 ymlaen, caiff sgoriau’r asesiadau eu cyfrifo’n unol â phroses ailsafoni, sy’n defnyddio dysgwyr 2022 i 2023 fel y garfan gyfeirio.

Cymorth ac arweiniad i ysgolion

Mae cymorth ac arweiniad ar gael ar wefan yr asesiadau. Ar ôl cael mynediad at y wefan, cliciwch 'Help' i gael mynediad at:

• fideos

• canllaw i ddefnyddwyr

• deunyddiau hyfforddi

• asesiadau ymgyfarwyddo

I gael cymorth ar yr asesiadau personol, cysylltwch â:

• y Ddesg Gymorth Asesiadau (ar gyfer ysgolion yn unig) ar 029 2026 5099 rhwng 8am a 5pm, dydd Llun i ddydd Gwener

• cymorth@asesiadaupersonol.cymru

I gael cymorth ar reoli cyfrifon defnyddwyr Hwb yr ysgol, cysylltwch â hwb@llyw.cymru neu 0300 0252525.

Asesiadau personol: canllawiau i ymarferwyr ar adroddiadau adborth a chynnydd i ddysgwyr unigol

Mae gweminarau ar gyfer athrawon ar gael ar system yr asesiadau personol.

Mae’r astudiaethau achos hyn yn amlygu’r defnydd o asesiadau personol i dargedu a gwella canlyniadau’r dysgwyr.

Astudiaethau achos fideo: defnyddio’r asesiadau personol i gefnogi dulliau asesu yn Ysgol Min y Ddôl

Mae gwybodaeth i rieni a gofalwyr hefyd ar gael.

Barn a phrofiadau dysgwyr, athrawon ac arbenigwyr asesu

Edrychwch ar y mathau o gwestiynau sydd yn yr asesiad personol Rhifedd (Gweithdrefnol) ar gyfer dysgwyr ym Mlynyddoedd 2 i 3

Edrychwch ar y mathau o gwestiynau sydd yn yr asesiad personol Rhifedd (Gweithdrefnol) ar gyfer dysgwyr ym Mlynyddoedd 4 i 6

Edrychwch ar y mathau o gwestiynau sydd yn yr asesiad personol Rhifedd (Gweithdrefnol) ar gyfer dysgwyr ym Mlynyddoedd 7 i 9