Sut galla i wneud cais

Er mwyn gwneud cais, rhaid i ymgeiswyr:

• feddu ar statws athro cymwysedig

• bod wedi cwblhau cyfnod sefydlu statudol (os cawsant SAC ar ôl 1 Ebrill 2003)

• meddu ar brofiad o rôl arweinyddiaeth uwch yn y sector addysg

Os yw'r ymgeiswyr mewn swydd addysgu gyfredol, rhaid iddynt hefyd fod wedi cofrestru gyda Chyngor y Gweithlu Addysg.

Gwybodaeth a sgiliau

Fel rhan o'u cais, dylai ymgeiswyr ddangos:

• eu hymrwymiad i gefnogi pob dysgwr, gan eu galluogi i fod cystal ag y gallant fod

• eu gwybodaeth a'u dealltwriaeth o gyd-destun a diwygiadau addysg Cymru, gan gynnwys gofynion Cwricwlwm i Gymru a'r Ddeddf ADY

• eu hymrwymiad i hyrwyddo'r Gymraeg a diwylliant Cymru

• eu hymrwymiad i gydraddoldeb, amrywiaeth a chynhwysiant, a chreu amgylchedd lle y mae dysgwyr a staff yn teimlo'n ddiogel i herio, rhannu syniadau a mynegi pryderon

• eu gwybodaeth a'u dealltwriaeth o'r hyn a olygir wrth addysgu a dysgu rhagorol a sut i'w sicrhau, er mwyn gofalu am anghenion amrywiol a chymhleth dysgwyr ar draws yr ysgol

• eu profiad o gyfathrebu a datblygu perthynas yn effeithiol â chymuned yr ysgol ac amrywiaeth o bartneriaid

• eu hymrwymiad i'r agenda diwygio addysg yng Nghymru

Ymddygiadau

Dylai ymgeiswyr hefyd nodi eu profiad o:

• fod yn wydn dan bwysau a pharhau'n bositif a brwdfrydig

• defnyddio tystiolaeth a gwybodaeth i wneud penderfyniadau effeithiol

• gweithredu ag uniondeb a sensitifrwydd

• parodrwydd i ddysgu

Mae tri cham i'r broses ymgeisio:

• cyflwyno ffurflen gais

• bydd ymgeiswyr sy'n llwyddiannus yn y cam sifftio yn cael eu gwahodd i gyfweliad

• Ceir rhagor o wybodaeth am bob cam isod

Mae'n ofynnol i ymgeiswyr gyflwyno ffurflen gais sy'n dangos tystiolaeth o'u sgiliau a'u profiad perthnasol yn unol â'r safonau proffesiynol ar gyfer arweinyddiaeth a'r gofynion cymhwysedd a phrofiad blaenorol.

Bydd fersiwn PDF o'r cwestiynau cais ar gael yma pan fydd y broses yn agor ddydd Mercher 25 Tachwedd 2026.

Dylid cyflwyno pob cais drwy'r ffurflen ar-lein erbyn 16:00 ddydd Llun 11 Ionawr 2027.

Mae'n ofynnol i ymgeiswyr ddarparu manylion dau ganolwr. Dylai un canolwr fod yn rhywun sy’n gweithio gyda chi bob dydd (er enghraifft eich rheolwr llinell), a dylai un canolwr fod yn rhywun sy’n gweithio ar lefel leol, ranbarthol neu genedlaethol

Rhaid i ymgeiswyr gadarnhau bod eu cais yn cael ei gefnogi gan eu pennaeth neu cyflogwr a'r Awdurdod Lleol.

Yn dilyn y dyddiad cau ar gyfer y ceisiadau, bydd panel dethol cenedlaethol CPCP Cymru yn dod ynghyd i asesu a didoli pob cais. Bydd y panel dethol yn cynnwys cynrychiolwyr o Sefydliadau Addysg Uwch, awdurdodau lleol, partneriaethau rhanbarthol a phenaethiaid presennol. Bydd enwau'r ymgeiswyr yn cael eu cuddio yn y cam hwn o'r broses.

Bydd ystyriaeth yn cael ei roi i'r galw am benaethiaid ar sail ddaearyddol, sector neu gyfrwng iaith wrth gytuno'n derfynol pa ymgeiswyr fydd yn symud ymlaen i gael eu hasesu.

Gofynnir am eirda ar gyfer y rhai sy'n llwyddo yn y cam sifftio cyn yr asesiad.

Bydd ymgeiswyr aflwyddiannus yn y cam sifftio yn cael eu hysbysu gan Dysgu erbyn dydd Llun 8 Mawrth 2027.

Bydd penderfyniad y panel sifftio yn derfynol.

Caiff yr ymgeiswyr sy'n llwyddo yn y cam sifftio eu gwahodd i'r cam asesu.

Bydd yr asesiadau yn cael eu cynnal mewn lleoliadau ar draws Cymru yn ystod mis Ebrill 2027.

Bydd rhagor o wybodaeth am yr hyn fydd ei angen fel rhan o'r cam asesu yn cael ei rannu â'r ymgeiswyr llwyddiannus yn dilyn y cam sifftio.

Unwaith y bydd yr holl asesiadau wedi'u cynnal, bydd y panel dethol cenedlaethol yn ailymgynnull i gymedroli.

Fel yn achos y cam sifftio, bydd y galw am benaethiaid, ar sail anghenion daearyddol, sector neu gyfrwng iaith, yn cael ei ystyried er mwyn cytuno'n derfynol ar yr ymgeiswyr llwyddiannus a fydd yn symud ymlaen i'r rhaglen.

Efallai y bydd y panel yn cytuno i osod ymgeiswyr ar restr wrth gefn os oeddent yn llwyddiannus yn eu hasesiad ond heb gael lle ar y rhaglen oherwydd yr angen i sicrhau cydbwysedd o gyfranogwyr ledled Cymru ac ar gyfer sectorau penodol. Gellid dod ag ymgeiswyr sydd ar y rhestr wrth gefn i mewn i'r rhaglen os bydd cyfranogwr arall yn gwrthod eu gwahoddiad, neu gellid eu blaenoriaethu ar gyfer y rhaglen nesaf.

Ni fydd ymgeiswyr yn gallu apelio yn erbyn penderfyniad panel dethol cenedlaethol CPCP.